Аб'яднаны пераходны кабінет Беларусі, утвораны лідэрам беларускіх дэмсіл Святланай Ціханоўскай, у новай заяве запатрабаваў вывесці з Беларусі расійскае войска, абвясціў несапраўднымі дамовы з Расіяй, якія пагражаюць суверэнітэту, і заклікаў дэакупаваць краіну «ўсімі даступнымі сродкамі».
Заява Аб'яднанага пераходнага кабінета Беларусі пад назвай «Аб прад'яўленні патрабаванняў да Расійскай Федэрацыі па безумоўным вывадзе войскаў з тэрыторыі Рэспублікі Беларусь» была апублікавана на беларускай мове 21 верасня. У ёй сцвярджаецца наступнае.
«Аб'яднаны пераходны кабінет Беларусі:
- Патрабуе ад Расійскай Федэрацыі безумоўнага, неадкладнага і поўнага вывядзення ўсіх сваіх войскаў і ваенных аб'ектаў з тэрыторыі Рэспублікі Беларусь.
- Лічыць несапраўднымі двухбаковыя пагадненні паміж Рэспублікай Беларусь і Расійскай Федэрацыяй, якiя пагражаюць суверэнітэту, незалежнасці і нацыянальнай бяспецы Рэспублікі Беларусь.
- Лічыць неабходным выхад Рэспублікі Беларусь з ваенна-палітычных і эканамічных саюзаў з Расійскай Федэрацыяй і выбудоўванне новай рэгіянальнай сістэмы бяспекі з удзелам дзяржаваў, якія прызнаюць і паважаюць незалежнасць, суверэнітэт, тэрытарыяльную цэласнасць і нацыянальную ідэнтычнасць Рэспублікі Беларусь.
- Звяртаецца да міжнароднай супольнасці – Арганізацыі Аб’яднаных Нацый, Арганізацыі па Бяспецы і Супрацоўніцтве ў Еўропе, Рады Еўропы, Еўрапейскага Саюза, Вялікабрытаніі, Злучаных Штатаў Амерыкі, Канады і іншых дзяржаваў і міжнародных арганізацый – з заклікам падтрымаць сваю заяўленую палітыку па забеспячэнні незалежнасці, суверэнітэту і тэрытарыяльнай цэласнасці Рэспублікі Беларусь комплекснымі практычнымі захадамі ва ўзаемадзеянні з Аб’яднаным Пераходным Кабінетам.
- Будзе дабівацца дэакупацыі Рэспублікі Беларусь усімі даступнымі сродкамі на падставе нормаў і прынцыпаў міжнароднага права».
Рэакцыі на заяву з боку расійскіх і беларускіх афіцыйных ліц пакуль не было.
Нагадаем, раней Святлана Ціханоўская звярнулася з нагоды магчымай мабілізацыі да суайчыннікаў — лідэр дэмсіл заявіла, што беларусы не павінны паміраць за амбіцыі Пуціна і памылкі Лукашэнкі, і заклікала ў выпадку мабілізацыі таксама ў нашай краіне не выконваць злачынных загадаў.