Беларусаў чакаюць змены ў працы міжнароднай сістэмы пераводаў WebMoney. Як паведамляе аператар гэтай сістэмы ў нашай краіне «Тэхнабанк», з 21 жніўня будзе прыпыненая эмісія электронных грошай. Гаворка пра беларускія рублі. «Люстэрка» даведалася падрабязнасці.
«З 21 жніўня 2023 года спыняецца эмісія электронных грошай WBM — беларускія рублі міжнароднай аплатнай сістэмы WebMoneyTransfer», — паведамляе банк.
Пры гэтым рэшткі сродкаў на рахунках трэба паспець вывесці цягам трох месяцаў з гэтай даты. Што будзе з грашыма, якія не выведуць за гэты час, у банку не змаглі патлумачыць. Як і тое, ці будзе адноўленая магчымасць папаўняць WebMoney.
Пры гэтым на беларускім сайце WebMoney яшчэ днём 20 ліпеня было пазначана, што з 1 жніўня спыняць адкрыццё новых кашалькоў. На момант выхаду гэтага тэксту гэтая інфармацыя была выдаленая з сайта сэрвісу. У «Тэхнабанку» не змаглі патлумачыць, ці перастануць адкрываць новыя кашалькі з 1 жніўня.
WebMoney — сістэма электроннага разліку. З дапамогай электроннага аналага беларускага рубля — WMB — можна аплачваць камунальныя паслугі, рахункі за тэлефон і інтэрнэт, заказваць дастаўку ежы ці рабіць пакупкі ў сеціве.
У кантакт-цэнтры «Тэхнабанка» ўдакладнілі, што фінустанова цяпер працуе выключна з кашальком у беларускіх рублях, з іншымі валютамі — не. Калі магчымасць папаўняць сродкі не адновяць, а тыя, што ляжаць на рахунках, трэба патраціць за тры месяцы, то фактычна можна казаць пра спыненне працы гэтага сэрвісу, гэта пацвердзілі ў «Тэхнабанку». Аднак удакладнілі, што рашэнне пра далейшы лёс WebMoney не прынятае, «ідуць перамовы». Да прыкладу, тэрмін вываду сродкаў з рахункаў можа змяніцца, паведамілі ў банку.
Чытайце таксама
