МУС і МЗС прынялі сумесную пастанову № 13/238 ад 31 кастрычніка 2023 года, якой уводзіцца тэрмін захоўвання няўручаных пашпартоў і адмяняецца інструкцыя пра абмен гэтых дакументаў для беларусаў за мяжой. Пастанова афіцыйна апублікаваная на Нацыянальным прававым інтэрнэт-партале.
Згодна з пастановай, гатовыя «персаналізаваныя, аформленыя, але няўручаныя пашпарты» для беларусаў, якія жывуць за мяжой, будуць захоўвацца ў пасольствах і консульствах цягам аднаго года з даты выдачы. Потым іх адправяць на захоўванне ў падраздзяленні грамадзянства і міграцыі МУС — «на месцы рэгістрацыі такіх грамадзян па месцы жыхарства».
Другім пунктам пастановы прызнаецца выхад з дзеяння прынятай яшчэ ў 2012 годзе інструкцыі па абмене пашпартоў беларусаў, якія жывуць за мяжой. Раней гэтым дакументам прапісвалася, што пашпарт можна памяняць у выпадках:
- заканчэння тэрміну дзеяння пашпарта;
- заканчэння старонак, прызначаных для адзнак;
- непрыдатнасці для выкарыстання;
- змены полавай прыналежнасці;
- змены (перамены) прозвішча, уласнага імені, імені па бацьку;
- выяўлення недакладнасцяў у звестках ці адзнаках у пашпарце.
Нагадаем, з 7 верасня афіцыйна ўступіў у сілу ўказ Аляксандра Лукашэнкі, згодна з якім дыпмісіі больш не будуць выдаваць пашпарты і афармляць некаторыя іншыя дакументы беларусам замежжа.
Чытайце таксама
