Белстат апублікаваў статыстыку па продажах прадуктаў і нехарчовых тавараў летась. З іх вынікае, што насельніцтва пачало менш купляць (а значыць, і есці) некаторай гародніны, уключаючы бульбу.
Аб’ёмы продажаў свежай бульбы летась зменшыліся на 3,5%. Разам з ім нашыя суграмадзяне пачалі ёсці менш свежых буракоў і капусты, хоць, здавалася б, гэта самая даступная гародніна. У якасці альтэрнатывы выбіраюць даражэйшыя таматы і агуркі. Іх продажы за год выраслі на 2,8% і 5,5% адпаведна.
Таксама насельніцтва пачало спажываць больш свежых садавіны і арэхаў (прырост на 3,2%).
Адваротная сітуацыя з мясной прадукцыяй. Калі свініны (-3,8%), ялавічыны (-23,2%) і нават птушкі (-5,6%) пачалі есці менш, то субпрадуктаў, наадварот, больш — рост на 10%. А мясных прадуктаў, вялікую долю ў якіх займаюць каўбасы і сасіскі, пачалі спажываць на 4% больш, чым у 2022 годзе. Менш актыўна прадаецца і рыба (-4,7%).
Атрымліваецца, што ў выпадку з гароднінай і садавіной насельніцтва пачало часцей рабіць выбар на карысць даражэйшых прадуктаў, а з мясной і рыбнай прадукцыі, наадварот, актыўней купляе танную.
У якасці добрай навіны можна было б разглядаць зніжэнне спажывання цукру — на 17,4%. Але пачалі актыўней спажываць цукеркі, продажы якіх павялічыліся на 3,8%.
Характэрна, што статыстыка зафіксавала зніжэнне аб’ёмаў продажаў круп, макароны і мукі. Між тым беларусы пачалі актыўней купляць сыры і яйкі.
Чытайце таксама
