Буйны арабскі інвестар Мухамед Алі Алабар, кампанія якога забудоўвае ў Мінску комплекс «Паўночны бераг», збіраецца прадаць сваю долю ў бізнесе ў Беларусі. Пра гэта піша Reuters са спасылкай на свае крыніцы. Як паведамляецца, ужо дасягнутая папярэдняя дамоўленасць пра продаж бізнесу. Нагадаем, гэты інвестар з ААЭ атрымліваў у Мінску добрыя ўчасткі зямлі пад забудову.
Хто можа купіць актывы ў інвестара з ААЭ, не паведамляецца. Паводле звестак Reuters, ягоны адыход з беларускага рынку звязаны з супрацоўніцтвам бізнесоўца з Джарэдам Кушнерам — зяцем экс-прэзідэнта ЗША Дональда Трампа. Як паведамляецца, Мухамед Алі Алабар можа заняцца перабудовай былога будынка штаба югаслаўскай арміі ў Сербіі ў жылы комплекс.
Паводле звестак Reuters, рашэнне інвестара сысці з Беларусі «стала навіной» для Аляксандра Лукашэнкі.
Нагадаем, Аляксандр Лукашэнка аддаваў кампаніі Мухамеда Алі Алабара добрыя ўчасткі зямлі ў Мінску пад забудову. Так, кампанія з ААЭ Emaar Properties займаецца засваеннем і забудовай тэрыторыі комплексу «Паўночны бераг», які мяркуецца ўзвесці ў паўночнай частцы Мінска. Гэта адна з найбуйнейшых эмірацкіх дэвелаперскіх кампаній, уладальнік самага высокага будынка ў свеце, дубайскага хмарачоса «Бурдж-Халіфа». Упершыню пра намер будаўніцтва «разумнага горада» ў Мінску кіраўнік кампаніі Мухамед Алі Алабар заявіў у кастрычніку 2020 года пасля сустрэчы з Лукашэнкам. Улетку 2021-га пасля яшчэ адной сустрэчы была падпісаная інвестыцыйная дамова з Emaar Properties пра будаўніцтва комплексу, які назвалі «Паўночны бераг». Праект быў разлічаны на тэрмін да 2040 года і меркаваў інвестыцыі ў 4 млрд еўра.
Восенню 2023 года Аляксандр Лукашэнка аддаў яшчэ адзін участак пад «Паўночны бераг».
Чытайце таксама
