Каля 600 бюлетэняў вынеслі з участкаў для галасавання на прамінулых прэзідэнцкіх выбарах. Пра гэта паведаміў падчас прэс-канферэнцыі 27 студзеня кіраўнік ЦВК Ігар Карпенка.
Выбары-2025, як і любая электаральная кампанія пасля прыходу ў 1994 годзе да ўлады Аляксандра Лукашэнкі, ні сумленныя, ні свабодныя. Падрабязней пра тое, як рэжым дзесяцігоддзямі крадзе галасы беларусаў і беларусак, мы расказалі ў праекце «Без выбару».
— Там, за мяжой, актыўна мусіравалі тэму: выносіць бюлетэні. <…> Нават не змаглі па адным бюлетэні з кожнага ўчастка вынесці. Вось так яны працавалі ўзмоцнена, — паведаміў Карпенка.
Кіраўнік ЦВК адзначыў, што «ад грамадзян і назіральнікаў не паступалі скаргі пра парушэнні выбарчага заканадаўства».
Нагадаем, паводле звестак падкантрольнага беларускім уладам ЦВК, на прэзідэнцкіх выбарах 26 студзеня за Алега Гайдукевіча прагаласавала 2,02% апытаных, за Ганну Канапацкую — 1,86%, за Аляксандра Лукашэнку — 86,82%, Сяргей Сыранкоў набраў 3,21% галасоў апытаных выбаршчыкаў, Аляксандр Хіжняк — 1,74%, супраць усіх — 3,6%.
Канчатковыя вынікі выбараў будуць падведзеныя 3 лютага.
Паводле папярэдніх звестак ЦВК, Аляксандр Лукашэнка пабіў уласны рэкорд «народнай падтрымкі».
- У другім туры на выбарах 1994 года ён набраў 80,34%.
- На выбарах-2001 — 75,65%.
- На выбарах-2006 — 82,97%.
- На выбарах-2010 — 79,65%.
- На выбарах-2015 — 83,47%.
- На выбарах-2020 — 80,1%.
