Следчы камітэт Беларусі распачаў крымінальную справу за стварэнне ў Літве і Польшчы беларускай вайскова-патрыятычнай арганізацыі «Паспалітае рушэнне» і яе падраздзяленняў — харугваў. Пра гэта паведаміла 13 снежня прэс-служба МУС.
Як заяўляюць у ведамстве, «Паспалітае рушэнне» сумесна з Аб’яднаным пераходным Кабінетам, BYPOL і планам «Перамога» вядзе працу па «арганізацыі замахаў на тэрытарыяльную цэласнасць, суверэнітэт, асновы канстытуцыйнага ладу і грамадскую бяспеку» Беларусі.
Паведамляецца, што СК 9 снежня распачаў і аб’яднаў у адну вытворчасць крымінальныя справы па артыкуле 361−1 КК аб стварэнні экстрэмісцкага фарміравання і ўдзеле ў ім супраць Валерыя Сахашчыка, Святланы Ціханоўскай, Аляксандра Азарава і «іншых асобаў».
Згодна з матэрыяламі крымінальнай справы, у «Паспалітае рушэнне» ўваходзяць палітыкі, якія выехалі з Беларусі, актывісты, студэнты, іншыя прадстаўнікі дыяспар, і пасля праходжання падрыхтоўкі яны павінныя «пад добрапрыстойнымі падставамі» вярнуцца ў Беларусь, дзе ў будучыні з іх сфарміруюць «пятую калону» для дыверсій, тэрактаў і агентурнай працы.
«Гэтую арганізацыю плануецца выкарыстоўваць у тым ліку для дэстабілізацыі абстаноўкі ўнутры краіны ў перыяд правядзення электаральных кампаній 2024−2025 гадоў», — лічаць у МУС.
Ведамства паведамляе, што цяпер на дачыненасць да «Паспалітага рушэння» ў рамках справы правяраюць больш за 200 чалавек з беларускіх дыяспар за мяжой. Вядзецца праца па выяўленні ў дыяспарах людзей, якія маюць дачыненне да іншых ініцыятываў, унесеных у спіс «экстрэмісцкіх». Іх шукаюць у тым ліку па «лічбавых слядах у інтэрнэце».
«Пры вяртанні названых асобаў у Рэспубліку Беларусь будуць прынятыя вычарпальныя меры па кваліфікацыі іх дзеянняў», — прыгразілі ў МУС.
Нагадаем, Аб’яднаны пераходны кабінет і Валерый Сахашчык абвясцілі пра стварэнне вайскова-патрыятычнай спартова-адукацыйнай арганізацыі «Паспалітае рушэнне» ў канцы верасня. Як заяўлялася, яе аддзелы — харугвы — ствараюцца ў Польшчы і Літве, далучыцца да іх могуць усе ахвочыя. У канцы лістапада МУС унесла ініцыятыву ў спіс экстрэмісцкіх фарміраванняў.