Следчы камітэт пачаў працэс спецвытворчасці ў дачыненні да дыпламата Уладзіміра Астпенкі. Пра гэта паведаміла 21 снежня прэс-служба ведамства. Астапенка быў паслом Беларусі ў Аргентыне, але сышоў пасля выбараў у жніўні 2020 года. Цяпер ён працуе ў Аб’яднаным пераходным кабінеце разам са Святланай Ціханоўскай, але судзіць яго будуць не за гэта.
Уладзіміра Астапенку абвінавачваюць па ч. 3 арт. 210 (завалодванне маёмасцю ў буйным памеры, здзейсненае службовай асобай з выкарыстаннем сваіх службовых паўнамоцтваў) Крымінальнага кодэкса Беларусі.
Спецвытворчасць у дачыненні да дыпламата распачатая 21 снежня.
Хто такі Уладзімір Астапенка
Уладзімір Астапенка займаў пасаду пасла Беларусі ў Аргентыне (Усходняй Рэспубліцы Уругвай, Рэспубліцы Парагвай і Рэспубліцы Перу па сумяшчальніцтве). Ён падаў у адстаўку ў дзень інаўгурацыі Аляксандра Лукашэнкі, 23 верасня 2020 года, заявіўшы, што верыць «у лепшую будучыню для беларускага народа».
3 лістапада таго ж года Лукашэнка падпісаў указ аб звальненні Астапенкі і пазбаўленні яго дыпламатычнага рангу «ў сувязі з учыненнем правіны, несумяшчальнай са знаходжаннем на дыпламатычнай службе». Астапенка ў корані не згодны з такой фармулёўкай прычыны свайго звальнення і спрабаваў праз суд яе змяніць, аднак суд яго патрабаванне не задаволіў.
Яму давялося пакінуць Беларусь.
У цяперашні час Уладзімір Астапенка працуе ў Аб’яднаным пераходным кабінеце разам са Святланай Ціханоўскай.
Што такое спецыяльная вытворчасць
Як тлумачаць на сайце СК, «спецыяльная вытворчасць — вытворчасць па крымінальнай справе ў дачыненні да абвінавачанага, які знаходзіцца па-за межамі Рэспублікі Беларусь і ўхіляецца ад яўкі ў орган, які вядзе крымінальны працэс». То-бок спецвытворчасць — гэта фактычна першы крок да нядаўна ўзаконеных у Беларусі завочных судоў над тымі, хто знаходзіцца за мяжой.
Разам з абвяшчэннем пра адкрыццё спецыяльнай вытворчасці СК выклікае фігурантаў у Беларусь для правядзення следчых дзеянняў — публікацыя гэтай інфармацыі на сайце ведамства паводле цяперашняга закона лічыцца належным паведамленнем.
Нагадаем, Аляксандр Лукашэнка ў ліпені падпісаў закон пра змены ў Крымінальна-працэсуальны кодэкс, якія дазваляюць судзіць беларусаў, што знаходзяцца за мяжой, завочна і нават асуджаць іх на расстрэл.
Як паказала практыка, «правядзенне папярэдняга расследавання ў парадку спецвытворчасці» займае няшмат часу. Напрыклад, справа алімпійскай чэмпіёнкі Аляксандры Герасімені заняла ўсяго два тыдні і ўжо разглядаецца ў судзе. Праўда, варта адзначыць, што справа ў дачыненні да алімпійскай чэмпіёнкі распачатая ў красавіку 2021 года, і асноўнае следства доўжылася больш за год.