Рэпетыцыя цэнтралізаванага экзамену пройдзе ў Беларусі 27 студзеня. Пра гэта БЕЛТА паведаміў міністр адукацыі Андрэй Іванец.
«Міністэрства адукацыі 27 студзеня 2024 года правядзе рэпетыцыю цэнтралізаванага экзамену. Яна пройдзе паводле тых жа правілаў, што і цэнтралізаваны экзамен у траўні 2023 года. Для гэтага вызначаныя 144 пунктаў правядзення. У рэпетыцыі ЦЭ возьмуць удзел больш за 58 тыс. выпускнікоў установаў агульнай сярэдняй адукацыі, што на 5 тыс. больш у параўнанні з мінулым годам. Рэгістрацыя, падвоз, суправаджэнне дзяцей педагагічнымі работнікамі, а таксама ажыццяўленне кантролю ў пунктах правядзення будзе арганізаванае ў поўнай адпаведнасці з інструкцыяй. Працэдура пройдзе па аналогіі з мінулым годам. Плануецца, што апрацоўка вынікаў будзе праведзеная ў двухтыднёвы тэрмін, у трохтыднёвы тэрмін усе вынікі будуць даведзеныя ўжо да ўдзельнікаў рэпетыцыі», — расказаў Андрэй Іванец.
Асаблівасцю рэпетыцыі цэнтралізаванага экзамену ў студзені стане тое, што яна пройдзе па ўсіх прадметах па выбары навучэнцаў, уключаючы дзяржаўную мову — рускую ці беларускую. «Мінулую рэпетыцыю мы праводзілі толькі па экзамене „прадмет на выбар“ без дзяржаўнай мовы. Гэтым разам дзеці змогуць выбраць у тым ліку адну з дзяржаўных моваў альбо іншы прадмет па выбары, які яны хочуць. Адзначу, што ў гэтым навучальным годзе як падчас правядзення першага этапу рэпетыцыйнага тэставання, так і падчас правядзення наступных, а таксама на рэпетыцыі цэнтралізаванага экзамену будуць выкарыстаныя тэсты з уключанымі заданнямі пятага ўзроўню складанасці. Гэта робіцца для таго, каб прывесці ў поўную адпаведнасць крытэрыі ацэнкі ў школе да крытэраў ацэнкі цэнтралізаванага экзамену, які з’яўляецца выніковай формай атэстацыі выпускнікоў», — праінфармаваў міністр.
Іванец падкрэсліў, што вынікі рэпетыцыі ЦЭ ні на што не паўплываюць. «Рэпетыцыя цэнтралізаванага экзамену праводзіцца для таго, каб выпускнікі 11-х класаў змаглі прайсці поўную працэдуру экзамену, пачынаючы з прыезду, падвозу — для тых дзяцей, якія знаходзяцца ў сельскіх населеных пунктах, запаўнення бланкаў. Таксама гэта добрая магчымасць праверыць свае сілы, бо структура і складанасць тэстаў падчас правядзення рэпетыцыі цэнтралізаванага экзамену будуць цалкам адпавядаць структуры і складанасці тэстаў, якія будуць прапанаваныя падчас правядзення як цэнтралізаванага экзамену, так і цэнтралізаванага тэставання ў гэтым навучальным годзе. Акрамя таго, пераводныя шкалы як першасных балаў у тэставыя, так і тэставых — у дзесяцібальную ацэнку будуць выкарыстоўвацца тыя ж, што выкарыстоўваліся падчас правядзення цэнтралізаванага экзамену і цэнтралізаванага тэставання ў мінулым навучальным годзе. Яны апублікаваныя ў вольным доступе і змяняцца не будуць», — дадаў Андрэй Іванец.
У свабодным доступе на сайце Міністэрства адукацыі размешчаны і пералік пытанняў для абітурыентаў, якія будуць паступаць на мэтавую форму падрыхтоўкі.
Плануецца, што цэнтралізаваны экзамен у гэтым навучальным годзе пройдзе 27 і 30 траўня, гэта будуць асноўныя дні. «З мэтай забяспечання роўных і справядлівых умоваў для выпускнікоў гэтага года і выпускнікоў мінулых гадоў, якія паступаюць ва ўніверсітэты, плануецца, што тэрміны правядзення цэнтралізаванага экзамену і цэнтралізаванага тэставання будуць адзіныя», — адзначыў міністр адукацыі.