Днём 29 лістапада стала вядома пра смерць намесніка начальніка Шчучынскага РАУС падпалкоўніка Сяргея Асавіка. Першым пра гэта са спасылкай на свае крыніцы паведаміла «Еўрарадыё». «Люстэрку» гэтую інфармацыю ў РАУС пацвердзілі.
Як паведамляла «Еўрарадыё» са спасылкай на свае крыніцы, падпалкоўніку міліцыі стала кепска на працоўным месцы, дактары хуткай не змаглі яго выратаваць.
Журналістка «Люстэрка» патэлефанавала ў Шчучынскі РАУС як мясцовая жыхарка. Там інфармацыю пра смерць Сяргея Асавіка пацвердзілі. Супрацоўніца расказала, што пахаванне пройдзе ў чацвер, 30 лістапада, але падрабязнасці пра абставіны смерці ўдакладняць не стала.
— Я не магу вам такую інфармацыю казаць. Паверце, вельмі цяжка, — сказала толькі яна па тэлефоне.
Сяргею Асавіку было 42 гады, у Шчучынскім РАУС ён займаў пасаду намесніка начальніка аддзела — начальніка міліцыі грамадскай бяспекі, да гэтага, як мінімум з 2013 года, у гэтым жа РАУС узначальваў аддзел аховы правапарадку, а пачынаў — участковым у Орлеўскім сельсавеце Шчучынскага раёна.
Раней «Наша Ніва» пісала, што ягоная жонка Наталля — малодшая сястра Анатоля Маркевіча, міністра культуры і экс-памочніка Лукашэнкі па Брэсцкай вобласці. Паводле звестак на лістапад 2020 года, яна працавала галоўным спецыялістам упраўлення эканомікі Шчучынскага райвыканкама.
Асавік падчас прэзідэнцкай кампаніі 2020-га здымаў мітынг Святланы Ціханоўскай у райцэнтры, як паведамляла «Чорная кніга Беларусі», выклікаў АМАП на пратэстоўцаў.