У Лельчыцкім раёне ў сярэдзіне дня ўлады паведамілі пра ўвядзенне рэжыму контртэрарыстычнай аперацыі. Тэлеграм-канал «МотолькоПомоги» адзначае, што ў рэгіён прыбылі як мінімум тры верталёты з Мінска. Мясцовыя службы спасылаюцца на абласное ўпраўленне КДБ, але падрабязнасцяў наконт таго, што здарылася ў рэгіёне, не агучваюць. «Люстэрка» даведалася, што адбываецца.
Што сказалі жыхарцы ў КДБ і міліцыі
Журналістка «Люстэрка» патэлефанавала ва Упраўленне КДБ па Гомельскай вобласці як занепакоеная жыхарка Лельчыц. Там каментаваць сітуацыю адмовіліся:
— Глядзіце навіны, — каротка сказаў супрацоўнік.
Пра тое, што адбываецца ў горадзе, мусяць ведаць у мясцовым РАУС. Туды мы таксама патэлефанавалі.
— Нічога не здарылася, усё добра! — адказалі ў аператыўна-дзяжурнай службе.
— Тады чаму рэжым такі ўвялі?
— Ды нічога не адбываецца. Не хвалюйцеся, — заявіў супрацоўнік і паклаў слухаўку.
— Дык, можа, на двор выходзіць нельга ці яшчэ нейкія патрабаванні? У мяне дзіця на дварэ гуляе — гэта бяспечна? — патэлефанавала журналістка яшчэ раз, каб даведацца, ці ёсць для жыхароў нейкія рэкамендацыі.
— Дык няхай гуляе дзіця, — спакойна адказаў дзяжурны.
— У нас жа рэжым контртэрарыстычнай аперацыі. Ніякіх рэкамендацый для жыхароў няма?
— Пакуль няма. Вядзіце звычайны лад жыцця, — паўтарыў суразмоўца.
Дзяжурны аператыўна-дзяжурнай службы, якая дзейнічае, каб адказваць на пытанні грамадзян па тэлефоне, дадаў: «Мы міліцыя, але не адказваем на такія пытанні па тэлефоне». Міліцыянт параіў даведвацца дэталі ў ваенкамаце або раённай газеце, якая выпусціла аб’яву.
Што кажуць у райвыканкаме
Тады журналістка «Люстэрка» як занепакоеная жыхарка патэлефанавала на гарачую лінію райвыканкама. Там расказалі, што ў Лельчыцкім раёне абвешчаная вучэбная трывога.
— МНС паведамленні адправілі, што трэба быць пільнымі і не палохацца сірэны. Пакуль усё ў звычайным рэжыме, — сказалі па тэлефоне. — У нас жа ўжо не ўпершыню такое — праводзяць вучэнні перыядычна. Часам загадзя ведаюць, часам стыхійна да нас прыязджаюць, правяраюць, як мы гатовыя — гарадскія службы РАУС, РАНС. У нас пакуль усё ў звычайным рэжыме, усе працуюць. А яны там правяраюць, ці атрымліваюць людзі абвесткі.
— Пішуць, што тры верталёты прыбыло з Мінска. Гэта МНС верталёты, атрымліваецца?
— Не гатовая вам пакуль сказаць — гэта вучэнні. На чым яны там прыехалі: машынамі, верталётамі — сілавыя структуры не даюць нам падрабязнай справаздачы, як у іх праходзяць гэтыя вучэнні. Можа, кіраўніцтва райвыканкама і ведае, але мы на гарачай лініі не, — сказала супрацоўніца і патлумачыла, чаму ў паведамленнях улады просяць насельніцтва захоўваць спакой і падпарадкоўвацца патрабаванням супрацоўнікаў сілавых структур. — У іх такі парадак. Калі б была нейкая сітуацыя, мы б ужо пра гэта ведалі. Але, раз мы працуем у ранейшым рэжыме, усё ў парадку. Пакуль ніякіх пазаштатных сітуацый я не ведаю. Не хвалюйцеся, будзем чакаць і спадзявацца, што яны адвучацца і мы будзем далей спакойна працаваць.
Чытайце таксама
