Былы палітвязень Аляксей Галоўкін нейкі час знаходзіўся ў санчастцы ПК-2 разам з Ігарам Леднікам. Ён расказаў выданню «Новы час», што турэмшчыкі ўвесь час здзекаваліся з Ледніка, не дазвалялі яму прымаць душ і атаварвацца ў краме.
— Мы сустрэліся з Ігарам у санчастцы. Мяне паклалі туды пасля каранціну (у Аляксея Галоўкіна гемафілія. — Заўв. рэд.), а Ігар ужо быў там. Мы пасябравалі. Цудоўны чалавек, вельмі разумны, цікавы.
Стан яго здароўя ўжо на той момант быў кепскі. Праз гэта Ігара нават не размяркоўвалі ў атрад. Ён чакаў і спадзяваўся, што яго вывезуць у гарадскую бальніцу, дзе больш-менш падлечаць.
У Ігара была стома, да якой быў прымацаваны пакет, каб ён мог хадзіць у прыбіральню. Больш за ўсё мяне абурыла тое, што супрацоўнікі калоніі не дазволілі яму прымаць душ, хоць у санчастцы быў нармальны душ з гарачай вадой. Ігару даводзілася пастаянна ваяваць з ахоўнікамі за кожны паход у душ, гэта кашмар.
Ігару не дазвалялі атаварвацца. Ён нават прасіў мяне перадаць начальніку атрада, каб той завёў яго ў краму, бо ўсё скончылася.
Ігар трымаўся вельмі годна, сапраўдны мужчына. Разам з тым ён казаў мне, што, хутчэй за ўсё, памрэ ў калоніі. Казаў, што стан здароўя ўвесь час пагаршаецца. І калі яму не акажуць кваліфікаваную своечасовую медыцынскую дапамогу, то да вызвалення ён проста фізічна не дацягне.
Нагадаем, 20 лютага стала вядома, што ва ўзросце 63 гадоў памёр былы сябра Беларускай сацыял-дэмакратычнай партыі (Грамада) Ігар Леднік.
Як паведамілі ў партыі, прычынай смерці стала спыненне сэрца. Медыкі спрабавалі яго рэанімаваць, але беспаспяхова. Леднік памёр у Мінскай раённай бальніцы, куды яго даставілі з Бабруйскай калоніі, дзе ён адбываў пакаранне.
Ігара Ледніка затрымалі 18 красавіка 2022 года. Спачатку яму прызначылі 15 сутак адміністрацыйнага арышту, але пасля іх ён на волю не выйшаў — на яго завялі крымінальную справу і асудзілі на тры гады калоніі за «паклёп» на Лукашэнку пасля публікацыі ў партыйным часопісе БСДП «Пазіцыя».
У яго была інваліднасць 2-й групы праз праблемы з сэрцам.
У чэрвені 2022 года адвакатка паведаміла, што стан здароўя палітвязня пагоршыўся, Ігар знаходзіўся ў санчастцы следчага ізалятара ў становішчы лежачы. У ліпені таго ж года стала вядома, што актывісту правялі аперацыю на страўнікава-кішачным тракце.