Суд вынес прысуды адразу дзвюм удзельніцам акцыі пратэсту, якая прайшла ў верасні 2020 года, піша праваабарончы цэнтр «Вясна».
Паводле звестак праваабаронцаў, Ганну Чаркас і Аляксандру Шыдлоўскую абвінавацілі ў актыўным удзеле ў дзеяннях, якія груба парушаюць грамадскі парадак (ч. 1 арт. 342 КК).
Паводле абвінавачання, Ганна і Аляксандра «публічна выкрыквалі лозунгі, ажыццяўлялі гучныя воплескі рукамі, блакавалі рух транспарту, чым нанеслі шкоду „Мінсктрансу“ сумай 5839 рублёў 65 капеек».
У судзе фігуравалі фатаграфіі, якія пацвердзілі іх удзел у акцыі пратэсту.
Суд прызначыў жанчынам пакаранне ў выглядзе абмежавання волі без накіравання ў папраўчую ўстанову адкрытага тыпу на тэрмін два гады шэсць месяцаў кожнай, вызваліўшы іх з-пад варты ў зале суда.
Палітзняволеная Ганна Чаркас была затрыманая 17 лістапада 2023 года і да суда ўтрымлівалася ў СІЗА № 1, Аляксандра Шыдлоўская — таксама. Абедзвюх МУС унесла ў «спіс асоб, якія маюць дачыненне да экстрэмісцкай дзейнасці».