У Італіі былы муж забіў беларуску Ганну Свірыдзенка праз тое, што суд перадаў ёй асноўную апеку на дзецьмі, і прывёз труп жанчыны ў паліцыю. Прадстаўніца Народнай амбасады Беларусі ў Італіі Юлія Юхно расказала «Нашай Ніве», што цяпер з хлопчыкамі і ці паедуць яны жыць на радзіму Ганны — у Беларусь.
У трагічна загінулай беларускі засталіся два маленькія сыны — ім цяпер тры і пяць гадоў.
— Дзеці пакуль у бацькоў забойцы, то-бок таты. Пытанне апекі будзе вырашацца ў судзе, бо хлопчыкі — грамадзяне Італіі. Часцей за ўсё дзяцей аддаюць бацькам маці, але тут будуць кіравацца інтарэсамі дзяцей. Калі яны ўсё жыццё жылі ў Італіі, хутчэй за ўсё, іх пакінуць тут. Калі не з бацькамі таты, то ў дзіцячым доме. Пакуль ніякіх падрабязнасцяў няма, акрамя таго, што прапуцінская асацыяцыя ў Модэне шукае магчымасці забраць дзяцей пад сваю апеку. Гэтага мы дакладна не дазволім зрабіць, таму адсочваем сітуацыю і застаемся на сувязі з адміністрацыяй горада, — расказала «Нашай Ніве» Юлія Юхно.
Нагадаем, 11 чэрвеня ў італьянскім горадзе Модэна 48-гадовы Андрэа Палтрыньеры, беспрацоўны інжынер, прывёз у паліцыю цела забітай ім былой жонкі — 41-гадовай беларускі Ганны Свірыдзенка. Труп жанчыны ляжаў у багажніку машыны з поліэтыленавым пакетам на галаве, пазней паліцэйскія заўважылі прывязаны да шыі электрычны провад.
Італьянец прызнаўся, што задушыў экс-жонку. Матывам забойства паслужылі спрэчкі наконт апекі над іх двума маленькімі дзецьмі.
Ганна Свірыдзенка мела грамадзянства Італіі. Жанчына была доктаркай і мела дзве адукацыі, працавала ў аўстрыйскай клініцы ў Інсбруку, была даследчыцай і публіцысткай і заканчвала спецыялізацыю па радыялогіі ў Модэне.
У мясцовай пракуратуры падазравалі, што Ганна стала ахвярай хвалі фемініцыдаў, якая назіраецца цяпер у краіне.
Тэма росту гвалту над жанчынамі ў апошнія месяцы атрымала новы імпульс у Італіі. Штуршком для шырокай дыскусіі стала забойства на поўначы Італіі 22-гадовай студэнткі Джуліі Чэкецін яе былым хлопцам. Яна ўспыхнула з новай сілай пасля абвяшчэння прысуду родным 18-гадовай Саман Абас — яе забілі бацькі і дзядзька за адмову выходзіць замуж за яе стрыечнага брата з Пакістана.
А ў канцы 2023 года Інстытут італьянскай энцыклапедыі Treccani назваў словам года «фемініцыд», то-бок забойства жанчыны ў сувязі з яе гендарнай прыналежнасцю.