Памёр вакаліст аднаго з першых «палітычных» панк-гуртоў у Беларусі Hate to State Віктар Маа Жаркевіч. Яму быў 51 год, паведаміла «Наша Ніва».
Віктар захапіўся панкам яшчэ ў падлеткавым узросце, за савецкім часам. У пачатку 1990-х ён з’ехаў у Германію і жыў там у захопленым панкамі будынку, удзельнічаў у мясцовым панк-руху. Пасля вяртання ў Мінск Маа прывёз не толькі ўражанні, але і веды пра мясцовую панк-сцэну.
Маа хацеў граць у стылі, які называецца краст-панк — гэта звычайна грубая і цяжкая, «гаражная» музыка з радыкальнымі сацыяльнымі тэкстамі. Віктар Жаркевіч у 1997 годзе стаў заснавальнікам і аўтарам тэкстаў мінскага панк-гурта Hate to State, які выступаў разам з выбітнымі дзеячамі беларускага року таго часу.
Гурт існаваў да 2000 года, а апошні канцэрт яны сыгралі разам з гуртом «Правакацыя», у якім вакалістам быў Альгерд Бахарэвіч. Пасля гэтага Віктар эпізадычна граў у розных гуртах і займаўся менш вядомымі праектамі.
Жаркевіча затрымліваў ГУБАЗіК у верасні 2022 года. Падчас затрымання Віктара моцна збілі. У дадатак яму зламалі аб галаву патэльню і прымусілі цягнуць з сабой у аддзяленне дзверы ад лядоўні, на якіх былі панк-рокерскія і анархісцкія налепкі і магніты за розныя гады.
Сябры мужчыны кажуць, што ягонае здароўе і маральны стан моцна падарвалі 30 дзён на Акрэсціна. Ён скардзіўся на боль і пасля выхаду з-за кратаў.
Жаркевіча звольнілі з працы на будоўлі і, прынамсі спачатку, не бралі на новую працу праз палітычныя абвінавачанні. Віктар перабіваўся выпадковымі заробкамі і часта скардзіўся сябрам на праблемы са здароўем.
Віктар Жаркевіч памёр 22 верасня 2024 года ў сваёй кватэры ў Мінску. Як кажуць знаёмыя, не вытрымала сэрца.