Баявы дух і рашучасць ва ўкраінскіх вайскоўцаў «непараўнальна вышэйшыя», чым у расіян, але рашэнні камандуючага групоўкай УС РФ ва Украіне генерала Сяргея Суравікіна знізілі шанцы УСУ на наступальныя дзеянні ў паўднёвым кірунку. Пра гэта, як піша «Спектр», гаворыцца ў матэрыяле Financial Times пра пяць урокаў расійска-ўкраінскай вайны.
Выданне параўноўвае няўдалую для УС РФ бітву за Кіеў са спробамі СССР гэтак жа вокамгненна завяршыць канфлікт у Афганістане, які зацягнуўся ў выніку на дзесяць гадоў. «Існуе гнятліва прамая паралель паміж тым, як група старых у Крамлі прыняла памылковае рашэнне ўварвацца ў Афганістан, і тым, як іншая група старых вырашыла ўварвацца ва Украіну. У абодвух выпадках вайскоўцы лічылі гэта кепскай ідэяй, але да іх не прыслухаліся», — расказаў выданню брытанскі эксперт і гісторык Марк Галеоці, які спецыялізуецца на расійскай тэматыцы. Галеоці — аўтар кніг «Нам трэба пагаварыць пра Пуціна», «Злодзеі — руская супермафія» і «Кароткая гісторыя Расіі».
Тым не менш Масква не адмаўляецца ад сваіх планаў, кажа ён. Украіна неаднаразова папярэджвала, што Расія плануе яшчэ адну пяхотную атаку на сталіцу, нягледзячы на вычарпанне рэсурсаў.
Брытанская газета называе другім і ключавым урокам гэтага канфлікту вяртанне «вялікай вайны»: «Вялікая вайна вярнулася, а разам з гэтым — і неабходнасць для краін мець прамысловы патэнцыял і велізарныя запасы зброі для падтрымання высокаінтэнсіўных баёў».
FT адзначае, што Захад, баючыся эскалацыі канфлікту і прамой канфрантацыі паміж краінамі NATO і Расіяй, супраціўляўся адпраўцы сучасных танкаў, ракет вялікай далёкасці і рэактыўных самалётаў Кіеву. «Ключавое пытанне 2023 года заключаецца ў тым, якую ваенную падтрымку Захад будзе аказваць Украіне», — заявіў выданню эксперт па бяспецы ў Каралеўскім каледжы Лондана Даміціла Саграмоза.
Трэцім урокам для Масквы выданне называе недаацэнку перавагі якасці над колькасцю. Нягледзячы на добрую лагістыку, колькасную перавагу і нядрэнную ваенную тэхніку, УС РФ дэманстравалі нізкі маральны дух і слабыя стандарты наступальных дзеянняў.
На думку эксперта аналітычнага цэнтра Rand Corporation Дары Масіка, прызначэнне генерала арміі Сяргея Суравікіна камандуючым расійскімі войскамі ва Украіне аказалася паспяховым.
«Суравікін умацаваў лінію фронту мабілізаванымі і спраектаваў паспяховы адыход з Херсона, дзе расійскія войскі знаходзіліся пад пагрозай разгрому. Новыя абарончыя пазіцыі расіян зніжаюць шанцы УСУ на зімовае наступленне, падчас якога яны збіраюцца адрэзаць сухапутны калідор, які цягнецца ўздоўж узбярэжжа Азоўскага мора і злучае Расію з Крымам», — заявіў ён.
Ананімны заходні эксперт па абароне заявіў, што байцы УСУ пакутуюць ад недахопу зброі і стомленасці, але пры гэтым іх маральны дух і рашучасць «непараўнальна вышэйшыя», чым у расіян.
Яшчэ адным урокам газета лічыць важнасць грамадзянскай супольнасці ў падтрымцы намаганняў арміі. Так, украінскія праграмісты распрацавалі праграмы, каб дапамагчы сваім вайскоўцам выяўляць расійскія пазіцыі, кухары гатуюць ежу для салдат на перадавой, а валанцёры збіраюць сродкі для пакупкі розных прыладаў — ад прыбораў начнога бачання да аптэчак.
Прафесар Ельскага ўніверсітэта Цімаці Снэйдэр заявіў, што «вялікая частка поспеху ўкраінцаў на поле бою залежыць ад упэўненай у сабе грамадзянскай супольнасці, якая падтрымлівае салдат». FT адзначае, што, паводле апошніх апытаньняў, 70 працэнтаў украінцаў хочуць працягваць вайну да перамогі, а расійская падтрымка вайны ў лістападзе скарацілася да 27 адсоткаў.
Пятым і, магчыма, самым галоўным урокам канфлікту журналісты называюць вайну на некалькіх франтах, і неабавязкова з дапамогай узбраенняў. Financial Times адзначае, што Пуцін пачаў абстрэлы аб’ектаў цывільнай і энергетычнай інфраструктуры Украіны, каб паспрабаваць зламаць волю народа і стварыць крызіс уцекачоў у Еўропе. Таксама ён пагражаў скарачэннем паставак газу Захаду з набліжэннем зімы і захоўвае магчымасці блакаваць экспарт украінскага харчавання ў Чорным моры. «Пуцін нібы кажа, што будзе абстрэльваць Украіну так доўга, як захоча. Нават калі бакі дамовяцца пра спыненне агню ў наступным годзе, яго агрэсія проста перамесціцца ў іншую плоскасць», — заявіў Марк Галеоці.
Нагадаем, раней выданне The New York Times апублікавала вялікі тэкст, прысвечаны аналізу таго, чаму Расія праваліла ўварванне ва Украіну.
