Мэр Кіева Віталь Клічко даў інтэрв'ю швейцарскаму выданню 20min, у якім раскрытыкаваў прэзідэнта Украіны Уладзіміра Зяленскага. Інтэрв'ю з’явілася на сайце выдання.
Журналістка спытала ў Клічко, ці ёсць у яго амбіцыі для прэзідэнцкай пасады.
— Было б па-дурному думаць пра гэта сёння. Сёння адзінае пытанне заключаецца ў тым, ці будзе Украіна наогул існаваць. Пуцін не прымае Украіну як незалежную краіну, гэта не сакрэт. Ён кажа, што Украіна — частка Расійскай імперыі. Мы змагаемся за нашую свабоду і незалежнасць. У нас ужо ідзе пазіцыйная вайна. Гэта проста па-дурному. Так што казаць цяпер пра мае палітычныя амбіцыі было б неразумна.
Далейшая частка дыялогу датычыла Зяленскага.
— Вы здзіўлены тым, што папулярнасць прэзідэнта Зяленскага падае ў параўнанні з войскам?
— Не.
— Чаму не?
— Людзі бачаць, хто эфектыўны, а хто не. А чаканняў было і ёсць шмат. Зяленскі расплачваецца за дапушчаныя ім памылкі.
— Якія памылкі ён здзейсніў?
— Людзі задаюцца пытаннем, чаму мы не былі лепш падрыхтаваныя да гэтай вайны. Чаму Зяленскі да канца адмаўляў, што яна адбудзецца. Ці чаму рускія змаглі так хутка дабрацца да Кіева. Было занадта шмат інфармацыі, якая не адпавядае рэчаіснасці. Але ўсё ж: у прэзідэнта сёння важная функцыя, і мы павінныя падтрымліваць яго да канца вайны. Але ў канцы гэтай вайны кожны палітык заплаціць за свае поспехі ці няўдачы.
Офіс прэзідэнта Украіны пакуль ніяк не каментаваў гэтае інтэрв'ю.