Палітвязень Аляксей Навальны памёр у калоніі. Пра гэта паведамілі ва Упраўленні Федэральнай службы выканання пакаранняў па Ямала-Нянецкай аўтаномнай акрузе.
У ведамстве ўдакладнілі, што пасля прагулкі Навальны А. А. «адчуў сябе дрэнна, практычна адразу страціўшы прытомнасць». На месца выклікалі хуткую.
«Праведзеныя ўсе неабходныя рэанімацыйныя мерапрыемствы, якія станоўчых вынікаў не далі. Дактары хуткай медыцынскай дапамогі канстатавалі смерць асуджанага», — паведамілі ва УФСВП.
Крыніца расійскага прапагандысцкага выдання RT заявіла, што ў Навальнага адарваўся тромб.
«Згодна з рашэннем сям'і Аляксея Навальнага я наогул нічога не каментую. Цяпер разбіраемся. Адвакат у Аляксея быў у сераду. Усё тады было нармальна», — расказаў адвакат Аляксея Навальнага Леанід Салаўёў.
У камандзе Аляксея Навальнага заявілі, што ніякіх пацверджанняў смерці палітыка ў іх няма.
«Адвакат Аляксея цяпер вылятае ў Харп. Як толькі ў нас будзе нейкая інфармацыя, мы яе паведамім», — гаворыцца ў пасце ў тэлеграм-канале паплечнікаў Навальнага.
Прэс-сакратар прэзідэнта Расіі Дзмітрый Пяскоў расказаў, што Уладзіміру Пуціну далажылі пра смерць Аляксея Навальнага. Пяскоў дадаў, што ў яго няма звестак пра прычыны смерці Навальнага, — «павінныя медыкі высветліць», «ФСВП займаецца ўсімі праверкамі, тут асаблівых даручэнняў не трэба».
ФСВП паведаміў, што ў калонію, дзе памёр Аляксей Навальны, адправяць камісію.
Адзначым, што за час зняволення Аляксея Навальнага 27 разоў адпраўлялі ў штрафны ізалятар. Паводле яго блізкіх, ён прабыў у ШІЗА 308 дзён. Апошні раз яго адпраўлялі ў штрафны ізалятар 1 лютага. Ён выйшаў з ШІЗА 11 лютага.
Нагадаем, Аляксей Навальны знаходзіўся ў ПК-3 у пасёлку Харп Ямала-Нянецкай аўтаномнай акругі Расіі, куды яго перавялі з ПК-6 ва Уладзімірскай вобласці.
Упершыню яго асудзілі на пазбаўленне волі ў лютым 2021 года. Яму прызначылі два гады і восем месяцаў калоніі агульнага рэжыму па справе «Іў Рашэ», прызнаўшы вінаватым у махлярстве. У сакавіку 2022 года яго прызналі вінаватым па іншай справе пра махлярства і абразу суддзі, прызначыўшы дзевяць гадоў калоніі строгага рэжыму.
У жніўні мінулага года яго прызналі вінаватым у стварэнні экстрэмісцкай супольнасці, закліках да экстрэмізму, стварэнні НКА, якая замахваецца на правы грамадзян, фінансаванні экстрэмізму, а таксама ва ўцягванні няпоўнагадовых у здзяйсненне небяспечных дзеянняў і рэабілітацыі нацызму. Яму прызначылі 19 гадоў пазбаўлення волі.
Чытайце таксама
