У выніку расійскага ўдару па Палтаве загінуў 41 чалавек, больш за 180 пацярпелі. Пра гэта паведаміў прэзідэнт Украіны Уладзімір Зяленскі.
«Атрымаў папярэднія даклады пра расійскі ўдар па Палтаве. Паводле наяўных звестак, дзве балістычныя ракеты трапілі ў навучальную ўстанову і суседнюю бальніцу. Часткова разбураны адзін з будынкаў Інстытута сувязі. Людзі апынуліся пад заваламі, многіх удалося выратаваць. Больш чым 180 чалавек параненыя, і, на жаль, вядома пра 41 загінулага», — сказаў Зяленскі.
Паводле яго, да выратавальнай аперацыі прыцягнутыя ўсе аператыўныя службы.
«Я ўдзячны кожнаму і кожнай, хто з першых хвілін пасля трапляння дапамагае людзям, хто ратуе жыцці», — дадаў прэзідэнт Украіны.
Паводле звестак Мінабароны Украіны, расійскія войскі выкарысталі дзве балістычныя ракеты. Часавы прамежак паміж трывогай і прылётам ракет быў такі кароткі, што заспеў людзей у момант эвакуацыі ў бамбасховішча.
Міністр унутраных справаў Украіны Ігар Кліменка паведаміў, што ратавальнікі лакалізавалі пажар і працягваюць разбіраць завалы. Работнікі ДСНС выратавалі 25 чалавек, 11 з іх дасталі з-пад завалаў.
«У найбліжэйшых жылых дамах ударная хваля пашкодзіла фасады і выбіла шыбы. Паліцыя праводзіць пакватэрны абыход, правяраючы, ці няма пацярпелых, і зафіксавала ўжо каля ста заяваў пра пашкоджанні маёмасці. Работы працягнуцца да поўнага завяршэння выратавальных аперацый», — адзначыў кіраўнік МУС.
Кіраўнік Палтаўскай АВА Філіп Пронін абвясціў трохдзённую жалобу ў вобласці з 4 верасня.