У Крамлі лічаць «суверэннай» пазіцыю Ірана што да вайны ва Украіне. Пра гэта паведаміў падчас брыфінгу 24 верасня прэс-сакратар прэзідэнта РФ Дзмітрый Пяскоў, каментуючы выказванне іранскага лідара Масуда Пезешкіяна, які заявіў, што ў ягонай краіне «ніколі не ўхвалялі расійскай агрэсіі».
— Гэта суверэнная пазіцыя Ірана. Мы працягнем тлумачыць нашую пазіцыю і ўсё, што звязана з гэтым канфліктам вакол Украіны, нашым іранскім сябрам, — адзначыў Пяскоў (цытата паводле тэлеграм-канала «ЕЖ/дневник»).
Спікер падкрэсліў, што ў Расіі «вельмі пазітыўна» развіваецца ўзаемадзеянне з Іранам «у самых розных галінах».
— Мы разлічваем на тое, што гэтае ўзаемадзеянне будзе і далей пашырацца, — сказаў Пяскоў.
Нагадаем, 23 верасня на палях Генеральнай Асамблеі ААН у Нью-Ёрку прэзідэнт Ірана Масуд Пезешкіян заявіў, што імкнецца да перамоваў з Захадам і адмаўляе пастаўку ракет Маскве. У ягонай краіне нібыта «ніколі не ўхвалялі расійскай агрэсіі» супраць Украіны.
— Мы гатовыя сесці з еўрапейцамі і амерыканцамі за стол перамоваў і дыялогу [з нагоды канфлікту Расіі і Украіны]. Мы ніколі не ўхвалялі расійскай агрэсіі супраць украінскай тэрыторыі, — заявіў Пезешкіян журналістам.
Чытайце таксама
